Vitit 2020 Kosova ia nis me humbje

Suedia ia ka vazhduar serinë e humbjeve Kosovës në ndeshjet e fundit në të gjitha garat dhe tashmë Kosova ka shënuar tre humbje radhazi, pas disfatës së sontme 1-0.

Golashënues i vetëm në fitoren e Suedisë ka qenë Simon Hedlund, që nga afërsia kur mbeti vetëm ka tundur pa shumë probleme rrjetën e Visar Bekajt, që ka qenë ndër futbollistët më të mirë të ndeshjes nga të përzgjedhurit e Bernard Challandesit sonte, 1-0 [Hedlund 75’].

Në pjesë të parë, Kosova e udhëhequr me disa nga futbollistët më me përvojë ka qenë shumë më stabile dhe më kërkuese, derisa në pjesë të dytë Suedia është treguar më e rrezikshme. E Kosova me disa kundërsulme që krejtësisht vareshin nga individi, raste jokonkrete - çoi edhe në mposhtjen e ekipit.

Suedia misionin në Katar e përfundon me 100% fitore. Pas Molldavisë 1-0 sonte ekipi i Janne Anderssonit mposhti edhe Kosovën 1-0 - për të shkuar qetë dhe suksesshëm në shtëpi.

E Kosova do të duhet që tash të nis të mendojë mirë e mirë për duelin jetik, të marsit kur duhet të udhëtojë në Shkup për ndeshje ndaj Maqedonisë Veriore.