Akhisar befason Fenerin, fiton Kupën!

Arritje historike nga ekipi i drejtuar nga Okan Buruk, derisa Akhisarspor është aktualisht duke festuar çmendur Kupën e Turqisë.

Ekipi modest që mezi shpëtoi nga rënia në Superligën turke, ka fituar sonte Kupën e Turqisë, pasi që mposhti Fenerbahçen, që llogaritej favorite e madhe për këtë ndeshje, 3-2.

Miguel Lopes i dha avantazhin Akhisarit në pjesë të parë, ndërsa në pjesë të dytë Fernandao ktheu Fenerbahçen në lojë duke barazuar 1-1.

Më pas, Abdoulwahid Sissoko dhe Helder Barbosa shënuan për 3-1 në të mirë të Akhisarit, derisa e tëra që arriti Feneri ishte zbutja e epërsisë, përmes Josef de Souzas në 3-2.

E zhvilluar në Diyarbakir, me festë të madhe në fund në të mirë të befasisë, Akhisar fitoi Kupën e parë të Turqisë në histori të klubit. Trajneri Okan Buruk, ish-reprezentues i Turqisë dhe mesfushor i dikurshëm i Galatasarayit dhe Interit, ka mposhtur në rrugë për finale Konyasporin në çerekfinale dhe ka eliminuar Galatasarayin në gjysmëfinale.