Boateng debuton, Barcelona mposhtet

Sulmuesi i ri i Barcelonës, Kevin-Prince Boateng ka debutuar sonte për ekipin e tij, ndërsa Barcelona është mposhtur nga Sevilla 2-0 në Ramon Sanchez Pizjuanin e nxehtë.

Golat për Sevillën erdhën në pjesë të dytë të ndeshjes, kur pas dy aksioneve të ndërtuara mirë, Pablo Sarabia së pari, e më pastaj edhe Wissam Ben Yedder lanë Jesper Cillessenin pa mundësi reagimi për 2-0 përfundimtare.

Pas golit të parë të pësuar Ernesto Valverde futi në ndeshje Philippe Coutinhon, Luis Suarezin dhe Jordi Alban, por rezultati nuk ndërroi.

Për të shkuar në gjysmëfinale, Barcelonës tash i duhet në Camp Nou fitorja minimale prej 3-0 ndaj Sevillës në përballjen që zhvillohet më 30 janar dhe nis në ora 21:30.