Derbi i Prishtinës

Prishtina ka arritur të shënojë fitore në derbin e mjegullt të Superligës së Kosovës, që nisi me gaz lotsjellës ndaj tifozëve, iu shty starti derisa u qetësuan gjakrat dhe përkundër se ia nisi me diell, përfundoi me reflektorë të ndezur në stadium. 

Golin e vetëm në ndeshjen e tensionuar në disa raste e ka shënuar kapiteni prishtinas, Azem Ahmeti, që me një goditje precize nga mbi 20 metra në minutën e 75-të të takimit ka bërë dallimin ndërmjet kampionit dhe nënkampionit aktual, Trepçës 89. 

Mitrovicasit në 20 minutat e fundit të takimit luajtën me dhjetë veta pasi që Drilon Musa morri kartonin e dytë të verdhë nga gjyqtari Bejtë Fejzullahu dhe u përshëndet nga ndeshja. 

Rast ideal për Trepçën 89 në pjesën e parë ka shpërdoruar i rikthyeri, Kreshnik Rexha, që nuk ka arritur të shënojë përkundër se ka dalë vetë para portierit prishtinas Kushtrim Mushica. 

Me këtë fitore, Prishtina ka marrë lidershipin në Superligën e Kosovës. 

Fitorja e parë për vushtrriasit

Llamkos Kosova ka regjistruar fitoren e parë të stinorit sot duke e mposhtur Drenicën 2-1. Në fakt, mysafirët kuqezinj kanë qenë të parët që kanë kaluar në epërsi me anë të golit të Qemal Elshanit. 

Mirëpo, në pjesën e dytë vushtrriasit kishin përgatitur një muhabet tjetër, ku i disponuari Liridon Ahmeti ka shënuar dy herë për të përmbysur rezultatin, sjellë fitoren për Llamkosin dhe për të regjistruar fitoren e parë në Superligë këtë stinor. 

Pampurët importojnë pikë

Fushë Kosova ka importuar një pikë tejet të rëndësishme nga Hajvalia sot. Djelmoshat e Zylkifli Obërtnicës kanë arritur të shënojnë gol dy minuta pa përfunduar takimi nëpërmjet Leutrim Beqirit për të anuluar epërsinë e hershme të Hajvalisë. 

Derbi i komshinjëve, pa gola

Komshinjtë, Drita dhe Ferizaj, kanë ndarë pikët në Gjilan. Drita dominoi në pjesë të parë me disa raste të huqura nga Florim Berisha, prej të cilave një e qindpërqindrë. Ndërsa në pjesën e dytë, sidomos kah finishi i ndeshjes, Ferizaji ka marrë iniciativë të plotë duke rrezikuar seriozisht, por fitorja nuk erdhi. 

Shkumbin Salihu dhe Qëndrim Dautaj u dalluan me raste për shënim, ndërsa Egzon Shabani dhe Driton Vokshi në dy raste goditën shtyllën e portierit gjilanas - që në fund dëshpëroi ferizajasit. 

Bardhë në Merdarë

Llapjanët nuk kanë arritur të mposhtin Ferronikelin në Merdarë sot. Përkundër rastit më të mirë të ndeshjes nga Mentor Zhdrella në pjesën e parë, kur goditi shtyllën, Hysi dhe Ferronikeli në fund u pajtuan me një 0-0 të zbehtë. 

Rezultatet dhe tabela aktuale.

RAIFFEISEN SUPERLIGA, SOT