TNS - FERONIKELI
Feronikeli ngrin uellsianët me Zekën e Fazliun
9 July, 2019 @21:47
Përkundër se nuk kishte shumë raste dhe të krijuara përgjatë gjithë ndeshjes, Feronikeli me dy sulme në fund të takimit ka shkrirë epërsinë 2-0 të The New Saints për të barazuar 2-2 në fund, për të marrë super avantazh para ndeshjes së kthimit në Prishtinë.
Greg Draper i dha epërsinë TNS-së 1-0 në fillim të pjesës së dytë nga penalltia (49’), pasi që pjesa e parë kishte përfunduar 0-0.
Feronikeli në ndërkohë tentonte, por pa raste konkrete. E në anën tjetër, një korner dhe një dalje e gabuar e portierit Jack Deniz Troshupa, bëri që Aeron Edwards të shënojë për 2-0 (77’) në të mirë të uellsianëve.
Por edhe pse rezultati 2-0, kampioni i Kosovës nuk u dorëzua, por u hodh me gjithë lojtarët në sulm. E kjo në fund u shpërblye.
Së pari Mevlan Zeka uli epërsinë në 2-1 (89’) kur shënoi me kokë pas krosimit të Astrit Fazliut. E krejt në fund, në kohën shtesë, mbrojtja e TNS-së luajti me dorë dhe gjyqtari pa hamendje dha penallti.
Astrit Fazliu i saktë. Dërgon topin në mes për 2-2 (90’+3) për të shkuar me avantazh të golit si mysafir në Fadil Vokrri, në përballjen e kthimit që luhet javën tjetër.
Asnjë ekip kosovar deri tash nuk ka arritur të luajë në raundin e dytë kualifikues të Ligës së Kampionëve.
E super rast për këtë ka Feronikeli, më 16 korrik 2019 me fillim nga ora 20:45 në Prishtinë.