Heroi Chibueze, Dukagjini me 10 lojtarë mposhtë Dritën

Një fitore tejet e rëndësishme për Dukagjinin nga Klina sot!

Sot skuadra e drejtuar nga Armend Dallku triumfoi me rezultat 2-1 (Ahmed Januzi 59’, Henry Chibueze 87’ / Almir Ajzeraj 39’) ndaj Dritës, të cilën e mposhti me përmbysje të rezultatit.

Për Dukagjinin kjo ishte fitorja e parë në këtë sezon të Superligës, kurse Drita sot e pësoi disfatën e dytë me radhë në ligë, pas asaj nga Gjilani fundjavën që e lamë pas.

Pjesa e parë u mbyll me rezultat 0-1 për gjilanasit. Topin e harkuar nga këndi, Kenan Haxhihamza i vendasve e largoi, e topi shkoi te Almir Ajzeraj i Dritës, i cili me një goditje të fuqishme e dërgoi topin në rrjetë (39’). Kështu, Drita shkoi në pushim me epërsi minimale.

TABELA AKTUALE

E pjesën e dytë Dukagjini e filloi mirë. Katër minuta pasi filloi pjesa e dytë, Ahmed Januzi realizoi me kokë për 1-1, për ta vendosur barazpeshën mes skuadrave.

Rreth 10 minuta më vonë, gjërat filluan të komplikohen për Dukagjinin. Elton Basriu i skuadrës në fjalë në minutën e 58’ u përjashtua me karton direkt të kuq, vendim i cili u mor pas rishikimit me VAR.

Superioriteti numerik në fushë bëri që Drita të bënte disa ndryshime sulmuese në formacion, e kjo iu revanshua në kahun tjetër. Pas një gabim në mbrojtjen gjilanase, Henry Chibueze, ish-sulmuesi i Lirisë e Vëllaznimit, që sapo ishte inkuadruar në lojë, e çoi topin në rrjetë në minutën e 87’, për t’ia dhënë kështu fitoren dhe pikët e plota Dukagjinit nga ky takim.

Kjo fitore, që erdhi edhe pse Dukagjini ishte me 10 lojtarë në fushë për një pjesë të konsiderueshme të ndeshjes, mund të jetë shumë e vlefshme për klinasit në luftën për mbijetesë, kurse për Dritën ky është një tjetër hap prapa në luftën për titullin kampion.