Nigeria në fund, e Senegali falë Gueyes - arrijnë gj’finalen

Nigeria dhe Senegali kanë kaluar çerekfinalet e Kupës së Kombeve të Afrikës.

Derisa Senegali ka mposhtur Beninin befasues deri tash, Nigeria është dashur të pres momentet e fundit të ndeshjes për të dalë në skenë William Ekong, ashtu që të përcaktohet fituesi i duelit ndaj Afrikës Jugore.

Senegali mposhti Beninin 1-0, kur Idrissa Gueye (69’) shënoi pas pasimit të Sadio Manes, e beninasit në 10 minutat e fundit luajtën me 10 lojtarë, pas skuqejes së Olivier Verdonit dhe më nuk kishin fuqi për më tepër.

Për Senegalin kjo është gjysmëfinalja e parë e arritur pas 13 vitesh.

E te Nigeria vendimtar është treguar William Troost-Ekong që shënoi një minutë para fundit të ndeshjes (89’) për përcaktuesen 2-1, pasi që Bongani Zungu kishte barazuar (71’, 1-1) pas avantazhit të fituar të nigerianëve me Samuel Chukwuezen (27’, 1-0).

Super-shqiponjat kanë qenë ekip më i mirë përgjatë ndeshjes, derisa John Obi Mikel qëndroi në bankë pas lëndimit që e kishte pësuar.

Nigeria do të ndeshet me Algjerinë ose Bregun e Fildishtë në gjysmëfinale të Kupës së Kombeve. Ndërsa Senegali në gjysmëfinale pret fituesin e duelit Madagaskar - Tunis.