Shpëtim direkt, Ferizaji i Superligës

Gjashtë fitore radhazi në gjashtë xhirot e fundit dhe Ferizaji tashmë ka siguruar mbijetesën direkte në Superligë.

Bardhekaltërit kanë mposhtur sot KEK-un në Obiliq, në një goleadë që përfundoi 2-5, ndërsa Ferizaji që parashihej të binte nga Superliga, jo vetëm që nuk ra, por edhe shpëtoi pa pasur nevojë të zhvillojë ndeshje barazhi.

Krejt kjo falë angazhimit të Bylbyl Sokolit në krye të ekipit në janar, ndërsa rezultatet erdhën me kohë, falë përforcimeve të bëra po në këtë afat.

Sot, një fitore jo edhe e lehtë ndaj KEK-ut, por e lezetshme në fund, pasi që të gjithëve iu shpërblye mundi për sezonin dramatik.

TABELA AKTUALE

Dardan Çerkini (20’) i dha epërsinë Ferizajit 0-1. Vendasit barazuan shpejt me Isa Eminhazirin 1-1 (25’), rezultat ky që figuroi në pushimin 15 minutësh.

E në pjesë të dytë ndeshja u hap në tërësi, ku Ferizaji me Ermal Krasniqin rimori epërsinë 1-2 (48’). KEK-u barazoi përsëri 2-2, kur shënoi Leonat Vitia (66’).

E pas kësaj Ferizaji atakoi plotësisht për të fituar ndeshjen dhe golat erdhën radhazi nga Blerton Mehmeti (68’), Qëndrim Dautaj (70’) dhe Ylber Luma (90’) për përfundimtaren 2-5.