Trajnerët nga Shqipëria kanë emra!

Pas diskutimeve të ndryshme në emisionet sportive të kanaleve televizive për “trajnerët nga Shqipëria” që po drejtojnë skuadrat kosovare dhe disa kritika nga ish-futbollistë të Superligës së Kosovës, ka reaguar ish-trajneri i Ballkanit, Ismet Munishi.

Ai ka thënë se trajneri është zgjidhje individuale e klubit ose e kryetarit të klubit.

“Personalisht po më pengon termi trajnerët nga Shqipëria,” ka thënë Munishi, duke postuar në llogarinë e tij në Facebook.

“Duhet të përdoret filan trajneri. Për sulmet që po marrin kolegët nga Shqipëria, duhet të reagojë shoqata e trajnerëve. Stop termit trajner nga Shqipëria,” ka shkruar ndër të tjera Munishi në postimin e tij.

“Trajneri ka emër!” ka shtuar Munishi.

Debatet e emisioneve të fundjavës i dhanë shumë rëndësi çështjes së trajnerëve të skuadrave kosovare me trajnerë që vinë përtej Drinit të Bardhë.

Kujtojmë, Klodian Duro, Bledar Devolli e Bledi Shkëmbi - janë tre trajnerët nga Shqipëria që punojnë në Kosovë. Drita drejtohet nga Ardian Nuhiji që vjen nga Maqedonia e Veriut. Njëjtë sikurse edhe Zekirija Ramadani i Prishtinës. Trajnerë nga Kosova kanë Besa, Arbëria, Llapi, Gjilani dhe Trepça’89.