Albin Krasniqi ia mohon Ballkanit vendin e dytë

Rikthimi i Ballkanit në pozitë të dytë të klasifikimit ka qenë shumë afër sot. Mirëpo, një super-gol i Albin Krasniqit shënuar nga gjuajtja e lirë i ka mohuar këtë djelmoshave të Ismet Munishit.

Ferizaji ka marrë pikën e parë në futbollin post-pandemik duke barazuar në shtëpi me Ballkanin 1-1 [Albin Krasniqi 78 - Arbër Prekazi 17]. Ballkani kapi epërsinë heret në ndeshje kur Arbër Prekazi (17’) me përvojë kërceu si duhet për të tundur rrjetën e Armend Blakçorit pas asistimit të Besnik Kransiqit.

Por Ferizaji i Burim Çerkinit nuk e kishte nijet që të dorëzohet kaq herët dhe kjo u kuptua brenda pjesës së parë, kur së pari Edon Sadriu (30’) e pastaj edhe Dardan Çerkini (35’) tentuan për të shënuar në portën e Armend Ruxhit.

TABELA AKTUALE

E në pjesë të dytë derisa Ballkani përforcoi pjesën e mesit të fushës duke futur Blend Baftiun dhe Edvin Kucin në lojë, ka qenë Ferizaji që ka shënuar.

Albin Krasniqi ka gjetur për mrekulli portën e Ruxhit të pafuqishëm në këtë gjuajtje të lirë, për të barazuar dhe për të sjellë gëzim të madh në stadium. Krasniqi me golin e tij (78’) 12 minuta para fundit të ndeshjes i dha pikën e shpresës ferizajasve, ndërsa Ballkanit i mohoi kalimin në vend të dytë të tabelës me fitore potenciale.

Deri në fund të ndeshjes Ferizaji ishte që tha fjalën kryesore sa i përket rasteve, kur Sadriu edhe njëherë tentoi për të tundur rrjetën e Ruxhit, që mbrojti.

Barazimi i jep shpresa të mëdha Ferizajit për shpëtim, veçanërisht nëse zhvillohet një lojë e tillë si sot, kurse Ballkani fitores do t’i mundohet t’i kthehet që në ndeshjen e ardhshme ndaj Vushtrrisë.