Arsenal s’arrin të mposht ekipin e fundit në grup

Kriza e skuadrës së Arsenalit ka vazhduar edhe në Europa Ligë. Pas rezultateve jo të mira në dy javët e fundit në Premier Ligë dhe eliminimit nga Kupa e Ligës, djelmoshat e trajnerit që gjithnjë e më shumë e ka të vështirë detyrën, Unai Emery, kanë arritur vetëm barazim ndaj ekipit, që deri sot s’kishte asnjë pikë në Grupin F të Europa Ligës.

Arsenal doli në epërsi me golin e Shkodran Mustafit (81’) dhe kur u mendua se po siguronin kualifikimin tutje, pasi që deri tash kanë pasur tre fitore nga tre ndeshje, ata pranuan gol.

Ka qenë Bruno Duarte (90’+1) që shënoi për barazimin 1-1 dhe kështu Vitoria Guimaraes ka nxjerrë pikën e parë në fazën grupore të Europa Ligës.

Pas kësaj ndeshjeje tabela e Grupit F në Europa Ligë duket kështu:

1. Arsenal 10 pikë, 4 ndeshje;
2. Eintracht 6 pikë, 3 ndeshje;
3. Standard 3 pikë, 3 ndeshje;
4. Vitoria 1 pikë, 4 ndeshje.

Siç dihet, Granit Xhaka, nuk ka qenë pjesë e ekipit as në këtë ndeshje, ndërsa tashmë edhe zyrtarisht nuk është kapiten te topçinjtë, derisa shiriti iu dha gabonezit, Pierre Emerick Aubameyang.