Chelsea siguron Saul Niguezin

Kampionja aktuale e Evropës, Chelsea, ka bërë të ditur mbrëmë vonë se ka siguruar shërbimet e mesfushorit spanjoll, Saul Niguez.

Niguez, që deri tash luajti te Atletico Madrid ka kaluar te Chelsea si huazim njëvjeçar me opcion blerjeje në fund të stinorit.

“Jam shumë i lumtur për sfidën time të re në karrierë. Do të jap maksimumin tim për të kaltërit dhe mezi pres të ndjej atmosferën nga tifozët e klubit. Shihemi së shpejti,” kanë qenë fjalët e 26-vjeçarit të transmetuara nga faqja zyrtare e Chelseat.

Saul përgjatë tërë karrierës së tij ka qenë pjesë e Atletico Madridit, ndërsa që prej vitit 2010 ka luajtur për ekipin e dytë të Atleticos, për të kaluar me kohë te e para, pos një stinori kur është huazuar për të fituar përvojë te Rayo Vallecano.