Dinamo, Olympiacos e Zvezda sigurojnë Ligën e Kampionëve

Tre ekipe të rajonit duke dalë më të mira në dy ndeshjet e PlayOffit të Ligës së Kampionëve, ndaj kundërshtarëve të tyre, kanë siguruar pjesëmarrjen në garën më prestigjioze të futbollit ekipor në botë.

Rosenborg vs. Dinamo Zagreb

Dinamo Zagreb pas fitore 2-0 ndaj Rosenborgut në shtëpi, sonte kanë barazuar 1-1 në Norvegji për të siguruar plasmanin në Ligë të Kampionëve.

Me këtë, Dinamoja që drejtohet nga Nenad Bjelica dhe me mesfushorin verimaqedonas Arijan Ademi, arrin për herë të pestë në nëntë stinorët e fundit sigurimin e fazës grupore të kësaj gare.

Kuban Krasnodar vs. Olympiacos

Në anën tjetër Olympiacosi e kishte më të lehtë kualifikimin. Pas fitores 4-0 në ndeshjen e parë ndaj Kuban Krasnodarit rus, sonte fituan edhe në Rusi 1-2 me golat e shënuara nga marokeni Youssef El-Arabi.

Për ekipin grek kjo është e 19-ta herë që siguron kualifikimin në Ligë të Kampionëve, që e bën atë ndër shtatë ekipet me më së shumti pjesëmarrje në këtë garë, me po aq pjesëmarrje sa edhe Arsenali.

Zvezda - Young Boys

Në fund, më i vështiri ka qenë dueli mes Zvezdës së Beogradit dhe Young Boysit zviceran, që me dy barazime dhe falë golave më shumë jashtë, ka bërë ekipin serb të shkojë në fazën grupore të Ligës së Kampionëve. Në Bern rezultati ishte 2-2, ndërsa sonte në Beograd 1-1.

Me këtë ‘triumf’ Zvezda siguron për të dytën herë radhazi këtë garë dhe bëhet ish-fituesi i dhjetë i kësaj gare që merr pjesë këtë stinor në fazën grupore të Ligës së Kampionëve 2019/20.

Duelet e mbetura

Nesër do të përcaktohen edhe tre vende tjera të mbetura për fazën grupore të Ligës së Kampionëve. Rezultatet e ndeshjeve të para:

Cluj - Slavia 0-1
APOEL - Ajax 0-0 dhe
LASK - Brugge 0-1.