Dramën në Podujevë e zgjidh Pefqeli

Dukagjini ka shënuar golin e parë të stinorit në Zahir Pajaziti të Podujevës, por kjo nuk mjaftoi për të nxjerrë pikë për ekipin e drejtuar nga Xhengis Rexhepi.

Ka qenë ish futbollisti i Prishtinës, Mërgim Pefqeli, që ka zgjidhur çështjen e fituesit sot në duelin dramatik në Podujevë, kur ka qëlluar portën e Flamur Nezirit në minutën e 80-të të ndeshjes për fitoren e llapjanëve 2-1.

Nëntë kartona të verdhë dhe një e kuqe u shpërndanë në ndeshje prej gjyqtarit kryesor Visar Kastrati, derisa Dukagjini ka treguar edhe njëherë lojë të mirë, por për fat jo të mirë, përsëri janë mposhtur!

TABELA AKTUALE E SUPERLIGËS

Derisa shënoi Llapi për epërsi, ka qenë Dukagjini që ka tentuar me Altin Llogën dhe Mark Milicajn. Të dy tentimet, të ndala nga portieri llapjan, Afrim Ademi.

E i harruar në shtyllë të dytë të portës, Armin Mujkic, ka shfrytëzuar maksimalisht krosimin e mjeshtrit të mesfushës, Mentor Zhdrella, për t’i dhënë epërsinë vendasve dhe për të shkuar qetë në pushimin 15 minutësh 1-0 (40’).

Reagimi i shpejt i Dukagjinit me ish lojtarin e Lirisë, Ilir Mustafa, u ndal nga shtylla! Përsëri pa fat për klinasit.

TABELA AKTUALE E SUPERLIGËS

Llapi në pjesë të dytë mbeti me 10 lojtarë në fushë. Kastriot Selmani që mori një karton të verdhë në fund të pjesës së parë të ndeshjes, u ndëshkua me të verdhën e dytë në minutën e 62-të për tu përjashtuar.

Këtë herë Dukagjini nuk fali. Husein Demiri shënoi (67’) për të barazuar 1-1, pas një harkimi të Granit Elezajt, që kishte zëvendësuar në fillim të pjesës së dytë Jeton Dushin.

Mark Milicaj huqi rast ideal më pas. Ai goditi në duart e portierit nga ku, ndoshta më lehtë është të shënosh!

TABELA AKTUALE E SUPERLIGËS

E kur nuk shënon, pranon! Sebino Plaku qëlloi shtyllën e hithave në minutën e 78-të të ndeshjes, ndërsa dy minuta më vonë i saktë u tregua Pefqeli që i dha fitoren llapjanëve 2-1 (80’).

Deri në fund të ndeshjes raste konkrete nuk kishte, ndërsa Llapi nuk la asnjë pikë të ikte sot nga Zahir Pajaziti për të kërcyer përkohësisht në pozitën e dytë të klasifikimit. Dukagjini i fundit në tabelë, tashmë me golin e parë të shënuar të stinorit dhe një pikë të fituar në fillim të stinorit.

i: