Finalja e 15-të në 16 vitet e fundit

Chelsea ka arritur të sigurojë biletën për finale të Kupës së Ligës së Anglisë, pasi që pas penalltive mposhti Tottenhamin në një ndeshje tejet dramatike sonte në Stamford Bridge.

Dueli pas 90 minutash përfundoi 2-1 [Kante 27, Hazard 38 - Llorente 50] në të mirë të Chelseat. Tottenham kishte fituar ndeshjen e parë 1-0. Rezultati i përgjithshëm nga dy takimet 2-2 çoi ndeshjen në penallti, pasi që Kupa e Ligës nuk llogarit shtesë golin si mysafir.

E pas penalltive, Chelsea u tregua i pagabueshëm nga pika e bardhë, duke fituar 4-2 [Willian, Azpilicueta, Jorginho, Luiz - Eriksen, Lamela, Dier x, Moura x] për të arritur finalen, ku e pret Manchester City i Pep Guardiolës.

Me këtë finale, Chelsea ka arritur të 15-tën në 16 vitet e fundit në të gjitha garat. Finalja e madhe e Kupës së Ligës së Anglisë do të zhvillohet më 24 shkurt në Wembley.