FLAMURTARI 2-1 BALLKANI
Flamurtari shkakton humbjen e parë të Ballkanit pas 1 dhjetorit
9 March, 2020 @16:06
Flamurtari ka arritur të dalë triumfues nga dueli i nxehtë i zhvilluar sot në Prishtinë, ku përballë kanë pasur liderin e Superligës, Ballkanin që nuk dinte për humbje në elitë prej 1 dhjetorit të vitit të kaluar.
Ekipi i Sunaj Keçit ka shënuar fitore 2-1 [Bashkim Shala 20, Veton Kabashi 48 - Mirlind Daku 89] për të marrë tre pikë jetike në luftë për mbijetesë në Superligë.
Me këtë fitore kuqezinjtë e Prishtinës kanë dalë nga pjesa e rrezikshme e tabelës.
Gjatë ndeshjes, Ballkani ka pasur dy gola të anuluara për shkak të pozitës jashtë loje. Mirlind Dakut dy herë (min 40 dhe 85) i është anuluar goli për shkak të pozitës jashtë loje.
Dominimi i Ballkanit ka qenë evident në pjesë të madhe të ndeshjes, por Ardit Nika në portën e Flamurtarit ka mbrojtur mirë për të siguruar ekipin e tij rreth pikëve të plota sot, në terren të vështirë për lojë.
E dy golat e Flamurtarit ishin nga pozitat ideale për vendasit. Njëra pas tollovisë në zonë në pjesë të parë, kur shënoi ish lojtari i Vushtrrisë, Shala, ndërsa në fillim të pjesës së dytë, pas ndërprerjes, Kabashi qëlloi me kokë për të shënuar për avantazhin dygolësh.
Tentimet e panumërta të Ballkanit nuk u konkretiuzan deri kah fundi i ndeshjes, kur Daku për herë të tretë tundi rrjetën e vendasve, e kësaj radhe iu pranua goli, ndërsa vendasit çuan ndeshjen deri në fund duke shkaktuar vonesa për të fituar tre pikëshin.