“Kam ardhur të shënoj gola”

Festim Alidema, ashtu siç paralajmëruam javë në parë, sot edhe zyrtarisht u bë pjesë e elitës kroate të futbollit, duke nënshkruar për ekipin Slaven Belupo.

Ai ka nënshkruar kontratë dy vjeçare që mund të vazhdohet edhe për dy të tjera, ka bërë të ditur klubi kroat në njoftimin e paraqitur në faqen zyrtare të klubit.

Alidema, që ka qenë pjesë e Vllaznisë së Pozharanit dhe e Llapit në Superligë të Kosovës së fundi ka shënuar 12 gola dhe 6 asistime në stinorin 2018/19.

“Tejet jam i lumtur që jam pjesë e Slavenit. Do të jap gjithçka nga vetja për të arsyetuar besimin që ma dha klubi, por edhe të arrijmë qëllimet që i kemi si ekip. Kam ardhur të shënojë gola dhe t’i ndihmojë ekipit për të arritur fitoret,” ka thënë Alidema 22 vjeç për faqen zyrtare të klubit gjatë prezantimit të tij si lojtar i ri i ekipit.

Alidema është eksport i dytë i Llapit që po shkon drejt Kroacisë së fundi. Më parë, ekipi nga Podujeva kishte përcjellë Mirlind Dakun drejt Osijekut, gjithashtu në Kroaci.