VËLLAZNIMI 0-1 MALISHEVA
Malisheva triumfon në Gjakovë, ruan lidershipin
28 February, 2021 @15:35
Skuadra e Malishevës, që përkundër rezultateteve të mira në pjesën vjeshtore të kampionatit ndërroi trajnerin Senad Alirifa me Arsim Thaçin, ka nisur mbarë pjesën pranverore të kampionatit.
Ata, sot kanë dalë triumfues në Gjakovë në përballje ndaj Vëllaznimit, duke shënuar fitore me rezultat minimal 0-1 [Albion Rrahmani 44’], ndërsa kjo ka qenë fitorja e dytë e ekipit në pranverë.
Goli i fitores për mysafirët e drejtuar nga Thaçi erdh në pjesë të parë të lojës dhe Vëllaznimi në pjesë të dytë nuk arriti të shënojë për të barazuar dhe kështu malishevasit arrijnë të mbajnë kreun duke shënuar fitoren e 10 të stinorit dhe distancën 2 pikëshe ndaj ndjekësit të parë dhe më serioz, Dukagjinit.
Vëllaznimi për momentin mbetet i shtati në renditje, me rrezik permanent për rënie, derisa ka pësuar humbjen e nëntë këtë stinor në Ligë të Parë A dhe ka ndër gol-dallimet më të rënda në këtë ligë, duke qenë se është në minus 13!