A&N 0-1 DUKAGJINI
Fitore e madhe e Dukagjinit, A&N mposhtet pas 3 muajsh
28 February, 2021 @15:26
Dukagjini i drejtuar nga Armend Dallku ka arritur një fitore të madhe sot në Korishë të Prizrenit, duke e mposhtur si mysafir skuadrën e A&N-së, që nuk din për humbje që nga mesi i nëntorit të vitit të kaluar.
A&N është mposhtur nga një gol i shënuar në pjesë të parë nga sulmuesi i skuadrës së Dukagjinit, Mark Milicaj, që goditi nga pika e bardhë në minutën e 19-të të takimit për përfundimtaren e ndeshjes A&N - Dukagjini 0-1 [Milicaj 19p.].
Në fakt pas golit të pësuar, A&N që drejtohet nga Megzon Visoka ka pasur rastet e veta por nuk ka arritur assesi të mposhtë Altik Muhaxhirin në portë sot, veçanërisht në minutat shtesë kur vendasit patën rast ideal nga 16m prej gjuajtjes së lirë.
Fitorja e mban Dukagjinin në pozitë të dytë të renditjes tabelare ende, por tash shkëputet nga A&N-ja me pikë.
Me këtë humbje, ka përfunduar edhe ecuria perfekte e A&N-së, që kishte 7 fitore radhazi në Ligë të Parë A, si dhe humbja e parë e Visokës prej se mori drejtimin e skuadrës prizrenase.