Rashford me supergol nga gjuajtja e lirë, eliminon Chelsean nga Kupa e Ligës

Sulmuesi i Manchester Unitedit, Marcus Rashford, ka shënuar dy gola në fitoren e Manchester Unitedit ndaj Chelseat në Stamford Bridge sonte, për t’i eliminuar këta të fundit nga Kupa e Ligës së Anglisë.

Rashford i kishte dhënë epërsinë Manchesterit nga penalltia në pjesë të parë, derisa sulmuesi i Michy Batshuayi kishte barazuar për të kaltërit me një aftësi vetanake, për t’i dhënë shpresa vendasve.

Por, brilanca e Rashfordit nga gjuajtja e lirë, me një “torpedo” - ka vendosur takimin, 1-2 në të mirë të ekipit të Ole Gunnar Solskjaerit, që tashmë ka shënuar tre fitore radhazi në të gjitha garat dhe duket se po kthehet në formë.

Kështu, Manchester United kualifikohet në çerekfinale të garës, ku tashmë pritet vetëm shorti që do të përcaktojë ato duele.

Të kualifikuar janë: Everton, Manchester City, Leicester City, Colchester United, Oxford United, Liverpool, Aston Villa dhe Manchester United.