Shkarkojnë trajnerin kampion

Trajneri që riktheu titullin kampion te Feronikeli, Zekirija Ramadani, është ndarë me ekipin e tij.

Njoftimin e ka zyrtarizuar ekipi i Feronikelit sot, përmes një njoftimi në web faqen e klubit, ndërsa Ramadani, që ka qenë trajneri i vetëm që punon në Kosovë dhe ka hyrë në listën e 1000 trajnerëve më të mirë në botë, pas aventurës historike të ekipit në kualifikime për Ligë të Kampionëve dhe Europa Ligë, largohet.

Njoftimi dhe arsyeja

“Kështu është vendosur pas një mbledhjeje të klubit me kryetarin Naser Ramaj, duke analizuar gjendjen e fundit dhe rezultatet e fundit,” është thënë ndër të tjera në njoftim.

Feronikeli ka fituar fazën parakualifikuese të Ligës së Kampionëve, për të dalë në raundin e parë kualifikues, ku pas dy ndeshjeve është eliminuar nga The New Saints.

Sukseset e Ramadanit

Më pas, ekipi nga Rexhep Rexhepi që ndeshjet në arenën evropiane i zhvilloi në Fadil Vokrri, në raundin e dytë kualifikues të Europa Ligës është eliminuar nga kampioni sllovak, Slovan Bratislava.

Përndryshe, shkupjani Ramadani ka bërë më parë edhe Trepçën’89 kampione të Kosovës, që e bën atë trajnerin e vetëm të lindur jashtë Kosove me këtë arritje (dy herë kampion, me dy ekipe të ndryshme). Zekirija Ramadani fitoi edhe Kupën e Kosovës me Feronikelin këtë vit.