Si kaloi gjysmëvjetori te Tottenhami?

Ekipi me futbollin më të mirë në Premier League tri vitet e fundit është ekipi më axhami. Kjo axhami më së miri pasqyrohet tek qendërmbrojtësi Davinson Sanchez.
Në një sezon ku lëndimet kanë mbajtur jashtë Danny Rosen e Toby Alderweireldin, axhamillëku tek linja e mbrojtjes, përjashto Vertonghenin, është vërejtur shpeshherë. Borozani.com

Në Premier League, Sanchez pos kartonëve të kuq që e kanë mbajtur deri tri ndeshje jashtë, ka ‘kontribuar’ edhe me autogola. Është çmim që duhet të paguhet për një të ri nëse dëshiron ta adaptosh në futbollin e Premier League. Diçka që duhet të ndjekin edhe trajnerët tjerë me lojtarë që kanë blerë edhe më shtrenjtë se Sanchezi! Davinson Sanchezi!

Aurier nuk ka lënë hapësirë të vërehet largimi i Walker. Por, ngjashëm si Sanchez edhe atij i nevojitet kohë për tu adaptuar tek ekipi i Spurs. Me çmimin që është marr, besoj që mund të shndërrohet në tre mbrojtësit e djathtë më të mirë në ligë.

Mesfusha ka pasur shumë rotacion. Një kohë lëndimet kanë ndjekur Spurs, por së fundmi kanë gjetur një stabilitet. Një ndër emrat kyç është Dier. Ai është një mesfushor defensiv, më defensiv se të zakonshmit. Është një pozitë që kryen punën kryesore në ekip, sidomos në një ekip ku ka talentë të mjaftueshme në mesfushë.

Njëri nga këto talente tek Spurs, ka dëshpëruar me të madhe muajt e fundit. Dele Alli është larg formës së tij. Duket i fjetur shumicën e kohës, dhe ndoshta është gjëja më e mirë për rritjen e tij mendore në fushë. Është lojtar temperament dhe ka nevojë për këshillim profesional që të shfrytëzoj talentin e tij të bollshëm.

Një talent i shkëlqyeshëm, edhe i pjekur përkundër moshës jo aq të madhe, del të jetë Harry Kane. Pas gushtit, ai ka vazhduar formën e shkëlqyeshme duke arritur të shënoj në përballjet kryesore. Dëshpërim ka qenë edhe Lamela, i cili akoma nuk ka gjetur veten pas lëndimit. Son është kthyer në njërën prej armëve kryesore krahas Kane javëve të fundit. Gjithashtu Llorente është rezervë e mirë në krahasim me rezervat që ka pasur vitin e kaluar.

Mbi të gjitha, meritat për suksesin, më shumë për lojën e bukur të Tottenham viteve fundit kanë nënshkrimin e Mauricio Pochettinos. Njëkohësisht me lojtarët e Spurs, edhe ai është pjekur viteve të fundit. Sezonin e kaluar shpeshherë adaptonte formacionin varësisht prej kundërshtarit dhe kjo kishte kundër-efekt. Këtë vit të tjerët po i adaptohen lojës së tij.

Këtë vit, Tottenham ka luajtur pa frikë dhe ka marr goxha rezultate pozitive ndaj ekipeve të mëdha. Tashmë janë pjesë e 6shes dhe atë pjesës së epërme të 6shes. Larg tabelës, loja e tyre është më e bukura nga ekipet e 6-shes angleze.