BALLKANI 3-1 VUSHTRRIA
Ballkani fiton për vend të tretë dhe Vushtrria bie nga Superliga
29 June, 2020 @19:28
Dy skuadra me qëllime të ekstreme në Superligë, derisa Ballkani me golin e parë pas-pandemik të shënuesit më të mirë të tyre Blend Baftiu kontrolluan lojën heret në ndeshje.
Ballkani mposhti Vushtrrinë 3-1 [Mirlind Daku 13, Blend Baftiu 18p, Arbër Prekazi 53 - Kushtrim Fazliu 78] për të shfrytëzuar gabimin e Gjilanit dhe për t’iu rikthyer pozitës së tretë në renditje.
Në anën tjetër, Vushtrria me sot edhe zyrtarisht është anëtare e re e Ligës së Parë, pasi me humbje humbi edhe gjasat teorike për mbijetesë në Superligë.
Dominimi i hershëm i Ballkanit tregoi dallimet e mëdha mes skuadrave. Në 10 minutat e para të ndeshjes Blend Baftiu (8’) tenton, mbron portieri i vushtrriasve Marly Prince, ndërsa që në sulmin tjetër Mirlind Daku tenton me kokë, por topi s’e gjen kornizën e portëss.
Ermal Krasniqi harkon në zonë në minutën e 13 të ndeshjes, ndërsa Mirlind Daku përsëri me kokë, kësaj radhe drejt portës, që me një prekje të portierit Prince merr kahjen drejt rrjetës për 1-0 fillestare.
Ermali s’u ndal. Futet në zonë, ndërhyn Etrit Halimi i Vushtrrisë dhe referi Visar Kastrati akordon penallti. I saktë Blend Baftiu (18’) 2-0 me golin e parë të tij post-pandemik, për t’iu kthyer pozitës së dytë në renditjen e golashënuesve.
Dominimi i djelmoshave të Ismet Munishit vazhdoi, ndërsa në fillim të pjesës së dytë mbrojtësi Arbër Prekazi (53’) shënoi për 3-0.
Pasoi periudha e zëvendësimeve te të dyja palët, derisa pas një lirimi të vendasve Kushtrim Fazliu shënoi golin e nderit për mysafirët 3-1 (78’) pas asistimit të Drilon Fazliut, për të përcaktuar përfundimtaren e ndeshjes.
Kështu, Ballkani i Munishit vazhdon ëndrrën për titullin e parë në histori dhe daljen e parë në histori në gara evropiane, ndërsa Vushtrria matematikisht bëhet anëtare e Ligës së Parë.