Cila skuadër ka orarin më të favorshëm?!

Përkundër humbjes në xhiron e XXII Ballkani ka përfunduar ciklin e dytë të ndeshjeve të Superligës si lider.

Ekipi i drejtuar nga Ismet Munishi ka një pikë më shumë sesa përcjellësi i parë i tij, Drita e Gjilanit, që ishte shpallë kampione në stinorin 2017/18.

Ballkani asnjëherë nuk e ka fituar titullin kampion të Kosovës, ndërsa sipas sistemit të Bergerit të ndeshjeve të ciklit të tretë të Superligës, suharekasit do të kenë si vendas ndeshjet ndaj ndjekësve kryesorë: Dritës e Prishtinës.

TABELA AKTUALE

E të dyja këto duele do të zhvillohen në xhirot e fundit të Superligës. Ballkani në xhiron XXXI do të pres Prishtinën, ndërsa në të fundit, XXXIII Dritën. Këto tre xhiro të fundit, nëse nuk ka rënie të madhe në formë të skuadrave, pritet të vendosin edhe kampionin e radhës në Superligë.

Derbi tjetër, Prishtina - Drita do të zhvillohet në xhiron XXX. E pas kësaj në xhiron XXXI Drita do të pres Gjilanin në derbin lokal, ku edhe Gjilani me formën që po tregon mund të futet ngushtë në luftë për titullin e parë kampioni në histori të klubit.

Prishtina nuk ka fituar titull kampioni që prej stinorit 2012/13, që është bërë periudha më e gjatë pa titull për rekord-kampionen e Kosovës!

TOP GOLASHËNUESIT

Ndërsa, prej se Kosova është pranuar në UEFA e FIFA, asnjë skuadër s’ka fituar dy herë radhazi titullin kampion. Kampioni aktual Feronikeli, vështirë shihet si mundësi për titull, mirëpo me ardhjen e trajnerit të ri të skuadrës, gjërat mund të ndryshojnë, pasi që ekip kanë.

Gjilani me treshen sulmuese Gerhard Progni, Fiton Hajdari e Tomislav Busic, të tre me nga tetë gola të shënuara, mund të rrezikojë seriozisht në luftë për titull! Skifterat pjesën përfundimtare të stinorit do ta kenë përplotë derbi. Do të presin Llapin në xhiron XXVII, do t’i shkojnë Feronikelit në xhiron XXVIII, presin Prishtinën në xhiron XXIX, para se të luajnë derbin lokal ndaj Dritës në xhiron XXXI e të ndeshen me Ballkanin në xhiron XXXII.

Përndryshe, të gjitha duelet - radhazi me orar që mund të ndryshojë sipas FFK-së dhe kërkesës së ekipeve e transmetuesit të ndeshjeve të Superligës, i keni në vegëzën përkatëse ku mund të shihni betejat e skuadrave të Superligës - si në luftë për titull, ashtu edhe për gara evropiane e për mbijetesë.