Drenica përmbys Dukagjinin për fitoren e dytë radhazi

Drenica ka marrë edhe fitoren e dytë radhazi në Superligë për të arritur 30 pikëshin në Superligë dhe stabilizimin edhe për një xhiro së paku në pjesën e sigurtë të renditjes.

Të kuqtë e drejtuar nga Gani Sejdiu kanë arritur të përmbysin brenda pjesës së parë epërsinë e hershme të klinasve për të fituar ndeshjen 1-3 në fund [Granit Arifaj 14 - Flamur Muleci 21, Argjend Mustafa 42, 84].

Dukagjini e nisi shpejt dhe më kërkues takimin, që rezultoi me gol menjëherë pas dy rasteve të Altin Merlakut dhe Laurant Marmullakut. Ka qenë Arifaj me përvojë që u dha epërsinë.

TABELA AKTUALE

Por përgjigja e mysafirëve nuk vonoi. Muleci reagoi mirë për të barazuar rezultatin shtatë minuta më pas, ndërsa Argjend Mustafa i disponuar për gola sot çoi në avantazh ekipin e tij 3 minuta para fundit të pjesës së parë.

Në pjesë të dytë nuk pati shumë ngjarje në lojë, derisa kah fundi i ndeshjes, në minutën e 84-të të duelit Mustafa shënoi golin e dytë të tij personal e të sigurisë për Drenicën.

Fitorja zbeh edhe më gjasat e Dukagjinit për shpëtim teorik të stinorit, ndërsa Drenicën e mban të qetë së paku edhe për një xhiro në pjesë jo të rrezikshme të Superligës.