Demolojnë Lirinë, shpresojnë në mrekulli

Gjilani ka shënuar fitore të lehtë dhe të bindshme ndaj Lirisë së Prizrenit sot duke i mposhtur thellë 4-0.

Mirëpo, kjo fitore nuk i garanton dalje nga zona e barazhit ekipit që drejtohet nga Gentian Mejzani! Gjilani në xhiron që vjen duhet të mposht Ferizajin si mysafir dhe të shpresojë.

Të shpresojë që Ballkani nuk e mposht Dritën në Suharekë, ose Drenica të mos e mposht Lirinë në Prizren! Këto janë llogarit e të kuqve nga anamorava për xhiron që vjen, derisa Liria tashmë dihet që është anëtare e Ligës së Parë dhe sot pati raste përmes Liridon Fetahajt dhe Fatih Karahodës (goditi shtyllën) por prizrenasit përsëri nuk shënuan.

E Gjilani e nisi ndeshjen vrullshëm, me Fiton Hajdarin që shënoi shpejt 1-0 (11’), dhe brenda 20 minutave lojë fitoren e kishin në duar, Keita Rezak 2-0 (20’).

TABELA AKTUALE

Vëllezërit Rezak (Keita dhe Aziz) iu kthyen Gjilanit sot, pasi që atyre iu kishte skaduar viza për qëndrim në Kosovë dhe për shkak të procedurave administrative është dashur të mos jenë prezent gjatë xhirove të kaluara.

E vëllau Keita i shpërbleu skifterat me dy gola sot. Pas të parit të shënuar në pjesë të parë, shënoi edhe të dytin e tij dhe të fundit për Gjilanin, pasi që Ansi Nika e kishte bërë rezultatin 3-0 (61’), në minutën e 69 kur goditi në portën e prizrenasve për përfundimtaren 4-0.

Gjilani me 38 pikë do të kërkojë vetëm fitore në xhiron e fundit ndaj Ferizajit, që sot ka shpëtuar stinorin. Barazimi nuk e shpëton ekipin e Mejzanit.

Por, e tërë kjo bëhet në llogari bashkë me humbjet e Drenicës dhe Ballkanit në xhiron e fundit. Shpresa për mrekulli te të kuqtë!

Përndryshe, si statistikë të përmendet, për Gjilanin kjo ka qenë vetëm fitorja e dytë në pranverë, ndërsa kjo ndaj Lirisë ka ardhur pas 5 humbjeve radhazi!

Gjilani ka mposhtur vetëm KEK-un dhe Lirinë në pranverë, dhe të dyja si vendas.