ARBËRIA 1-0 MALISHEVA
Fitore në sekondat e fundit të derbit, vazhdon presioni ndaj kreut
7 March, 2020 @21:37
Arbëria ka shënuar fitore minimale por jashtëzakonisht të rëndësishme për të ndjekur kreun e Ligës së Parë, Besën e Pejës.
Ekipi i Arbërisë ka arritur të shënojë fitore të madhe ndaj Malishevës sot në Sami Kelmendi duke i mposhtur këta të fundit me golin e shënuar në sekondat e fundit të ndeshjes, kur pas një centrimi të faulit nga mesi i fushës, topin në tentim ta largojë, mbrojtësi i Malishevës Dardan Jashari e çoi në portë të vetë dhe kështu ndeshja përfundoi me 1-0 [Dardan Jashari 90+5ag].
Fitorja e mban Arbërinë në vend të dytë të klasifikimit, për momentin me një pikë më pak se Besa e Pejës, që luan duelin e radhës ndaj Vëllaznimit.
E Malisheva, së cilës iu anulua një gol nga referi për shkak të pozitës jashtë loje, pas humbjes tentoi të qëronte hesapet me referin kryesor, por që u ndal nga policia dhe sigurimi i stadiumit.
Në anën tjetër Malisheva e ka quajtur referimin skandaloz që anuloi golin e tyre, si dhe shpërndarjen e dy kartonave të kuq e katër të verdhave, duke cekur se FFK duhet të marrë masa ndaj referëve të sotëm Fitim Sadriu e Flurim Jakupi.
Ata gjithashtu kanë postuar edhe inçzimin e golit të tyre, që nuk u pranua nga referët.
Përndryshe, nga tre ndeshjet e sotme të zhvilluara në Ligë të Parë vetëm Arbëria ka arritur të dalë fituese, pasi që në duelet tjera pikët u ndanë, Istogu 1-1 2 Korriku dhe Vitia 2-2 Vllaznia.