Liria në TOP3 pas fitores

Liria e drejtuar nga Bledi Shkëmbi nuk e ka pasur vështirë të shënojë fitore ndaj juniorëve të Besës sot në Prizren, duke i mposhtur ata me rezultat bindës, 3-0.

Epërsinë Lirisë ia solli Ilir Mustafa me golin e shënuar me parabollë në minutën e gjashtë të takimit, ndërsa Mustafa formën e mirë të tij sot e tregoi duke tentuar edhe në disa raste si dhe duke goditur shtyllën kundërshtare, por gol nuk kishte më në pjesë të parë.

TABELA AKTUALE E SUPERLIGËS

Më pas, në pjesën e dytë në skenë doli Qëndrim Gashi që hoqi dilemat e fituesit. Qëndrimi shënoi dy herë (një asist nga Besart Islamaj) në 22 minutat e fundit të takimit për t’ia sjellë fitoren e tetë të stinorit dhe për të ngritur ekipin në pozitën e tretë të klasifikimit me një ndeshje më shumë se rivalët tjerë që luajnë nesër e pasnesër.

Besa vazhdon të fundoset në Superligë, duke mbetur në 13 pikë pas krizës financiare që po kalon, ndërsa Liria ka regjistruar ndeshjen e 11 të stinorit pa pranuar gol pas 17 xhirove.