GJILANI 2-2 LLAPI
Llapi i prish punë Gjilanit, Progni shpëton ‘skifterat’
29 June, 2020 @19:28
Sulmuesi i ri i Llapit, Valmir Veliu, ka qenë protagonisti më i pa-pëlqyer për vendasit në Gjilan sot, derisa shënoi dy herë për t’ia dhënë dy herë epërsinë skuadrës së tij, në atë që në fund doli barazim 2-2 [Keita Razak 22, Gerhard Progni 90 - Valmir Veliu 15, 42] mes Gjilanit dhe Llapit.
Por për veti dhe adhuruesit e përgjithshëm të futbollit, Veliu ka treguar se është prospekt që ia vlen dhe shpejt pritet të dalë në liga më të forta.
Gjilanin e Gentian Mejzanit e shpëtoi mesfushori ofanziv me shumë përvojë, Gerhard Progni, që me golin e tij në fund të takimit barazoi rezultatin në 2-2, për t’ia siguruar pikën ekipit të tij.
E Veliu ka qenë i pandalshëm në pjesë të parë të ndeshjes, ku me depërtime, shënime dhe lojë të mirë çoi skuadrën e tij në pushim me avantazh 1-2.
Veliu hapi serinë e golave në ndeshje kur shënon në minutën e 15 të takimit 0-1, e pas barazimit nga Keita Razak 1-1 (22’), ai me solo-aksion në zonë shënon për 1-2 (42’).
Në pjesë të dytë zëvendësime te Gjilani rreth minutës së 70. Darko Nikaç e Kushtrim Shabani futen në lojë në vend të Fjoart Jonuzit dhe Fiton Hajdarit. Por goli erdhi krejt në fund, kur Progni me një perlë nga largësia barazon në 2-2.
Barazimi ia humbi Gjilanit pozitën e tretë, duke i rrëzuar në të katërtin, derisa Llapi mbeti aty ku ishte, në pozitën e gjashtë.