Neymar vendos përsëri, Barça mposht Unitedin

Vetëm 4 ditë pasi që vendosi ndeshjen ndaj Juventusit, braziliani Neymar, ka vendosur edhe një ndeshje për ekipin e tij, Barcelona.

Ai ka shënuar golin e vetëm në fitoren e sotme ndaj Manchester Unitedit, në ndeshjen e zhvilluar në kuadër të International Champions Cup, turneut të ekipeve të mëdha europiane, të shpërndara në botë, në fazën përgatitore të tyre.

Neymar me këtë ka treguar se është plotësisht në formë, para stinorit të ri, pa marrë parasysh se a do të mbetet te Barcelona, apo siç po spekulohet, do të bëhet transferi më i shtrenjtë në futbollin botëror, nëse kalon te Paris St Germain.

Një sulm i dështuar i Unitedit, solli golin e Barcelonës, kur Luis Suarez nisi kundërsulmin shpejt. Uruguajani gjeti Lionel Messin në mes të fushës që çoi topin deri afër 16-shes, për të pasuar te Neymar, që përkundër shtyerjes së mbrojtësve të Unitedit, nuk u dorëzua dhe shënoi.

Trajneri i Barcelonës, Ernesto Valverde, ka luajtur me 11-shen më të fortë në pjesë të parë, përveç Gerard Piques dhe Andres Iniestas, ndërsa i tërë ekipi ka ndërruar në pjesë të dytë, përveç portierit Jesper Cillessen.

Në anën tjetër, Jose Mourinho, njejtë, ka luajtur me 11-shen më në formë në dispozicion që ka, ndërsa në pjesë të dytë nuk ka lëvizur nga ekipi vetëm Paul Pogban, Romelu Lukakun dhe Marcus Rashfordin.

Barcelona e ka edhe një ndeshje për ta zhvilluar pas kësaj të sotmes në SHBA, ku në Miami luan El Clasicon ndaj Real Madridit. United, në anën tjetër merr rrugë për Britani, me 2 fitore dhe këtë humbje, për të nisur Premier Ligën.

Neymar GOAL - Barcelona vs Manchester United 1… by 87taras