Quique Setien, trajner i ri i Barcelonës

Disfata në Superkupë ishte vendimtare. Bordi i Barcelonës më në fund vendosi “të shpëtonte” nga periudha e Ernesto Valverdes në ekipin katalonas.

Dhe, pasi që Xavi Hernandez refuzoi ofertën e klubit duke thënë se është ende heret që ai të merr në supe skuadrën, drejtuesit e klubit vendosën që detyrën për zëvendësues të Valverdes t’ia japin njeriut që arriti t’i mposht në Camp Nou.

Quique Setien është trajner i ri i Barcelonës, bën të ditur MundoDeportivo para pak çastesh.

Shpejt pritet zyrtarizimi i tij nga klubi, ndërsa klubi është duke u marrë me ndërprerjen e kontratës së Valverdes deri në atë kohë.

Setien 61 vjeç së fundi ka qenë i papunë, por mbahet mirë në mend nga adhuruesit e LaLigas si trajner i jashtëzakonshëm i Real Betisit nga stinori i kaluar.