Traore dënohet, Qosa pezullohet

Komisioni Disiplinor i shkallës së parë të Superligës në mbledhjen e mbajtur dje pas shqyrtimit të procedurave të hapura nga Komisioni i Garave të Superligës ka vendosur që të dënojë futbollistin e Trepçës’89 me dy ndeshje zyrtare sipas radhës me moslojë.

Lassine Traore për shkak të kartonit të kuq dënohet me ndalesë loje për dy ndeshjet e radhës zyrtare me ekipin e tij. Dënimi i Traores vjen nga dueli i zhvilluar mes Feronikelit dhe Trepçës’89.

Trajneri i portierëve të Flamurtarit, Labinot Qosa, është pezulluar nga detyra e tij deri sa të kompletohet lënda, pasi i është kërkuar deklaratë plotësuese. Ai ka marr karton të kuq në përballjen Flamurtari-Gjilani.

Ndërsa klubit të Trepçës’89 i është kërkuar të dërgojë raport plotësues për futjen e tifozëve në fushë për të festuar pas golit të dytë të shënuar në përballje ndaj Prishtinës në xhiron e fundit të stinorit, gol ky që e shpëtoi skuadrën mitrovicase nga rënia.

Kartonat tjerë në ndeshjen mes Flamurtarit dhe Gjilanit ende nuk janë proceduar si duket, pasi që faqja zyrtare e FFK-së nuk ka bërë të ditur asgjë sa i përket këtyre.

Kujtojmë në përballjen mes Flamurtarit dhe Gjilanit thuajse e tërë banka e shtabit teknik të ekipit kuqezi nga Prishtina kishte marrë karton të kuq.