FFK: Të hënën vendoset për biletat

Para ndeshjes së rëndësisë së jashtëzakonshme për Kosovën, ndaj Maqedonisë Veriore më 26 mars, lidhur me biletat që do t’i ketë në dispozicion Kosova do të vendoset të hënën.

Kështu i ka thënë sekretari i FFK-së Eroll Salihu Kohavisionit.

“Të hënën vendosim për të gjitha lidhur me biletat që i kemi në dispozicion,” ka thënë shkurt Salihu, bën të ditur Kohavisioni sot.

Kosova pritet të ketë në dispozicion rreth 3 mijë bileta të stadiumit Todor Proeski, që i takon sipas rregullave të UEFA-së ekipit mysafir.

Ndërkaq, udhëheqësi i tifo-grupit të reprezentacionit të Kosovës Dardanët ka theksuar se ka plotësuar listën me emrat e 2 mijë tifozëve që do të marrin biletat. Emrat do të dërgohen të hënën në FFK, e më pas për secilin do të vijë bileta e personalizuar.

Pos këtij dy mijëshi, FFK-ja pritet t’i ketë edhe mbi 1 mijë bileta tjera për të cilat gjithashtu vendoset të hënën.

Në anën tjetër, gjithçka sa i përket kësaj ndeshjeje mund të bie në ujë, nëse shteti maqedonas vendos që ndeshja të luhet me dyert e mbyllura, pa praninë e tifozëve, për shkak të rrezikut prej coronavirusit.

Një gjë të tillë ka propozuar sot edhe Ministri i Shëndetësisë së Maqedonisë, ndërsa të njëjtën e ka bërë të ditur ditë më parë edhe kreu i FFM-së, Muhamed Sejdini.

Kosova do ta ketë përballë Maqedoninë Veriore më 26 mars 2020 në 20:45 në Shkup, në ndeshjen gjysmëfinale të PlayOffit të Ligës D të Kombeve. Në gjysmëfinalen tjetër luajnë Gjeorgjia - Bellorusia. Fituesi i finales nga këto katër skuadra, do të shkojë për herë të parë në histori të vendit në Kampionat Evropian, EURO 2020.