Leipzigu i Nagelsmannit eliminon nënkampionin e Evropës

Tottenham Hotspur i ka dhënë fund garave evropiane heret sivjet, duke u eliminuar në të tetën e finales së Ligës së Kampionëve nga befasia tjetër e këtij stinori në këtë garë, Leipzigu.

Leipzigu i drejtuar nga trajneri i ri, por me emër, Julian Nagelsmann, ka arritur që pas fitores si mysafir në Londër të shënojë fitore edhe në RedBull Arena të Leipzigut për të zënë vend në tetëshen më të mirë të stinorit në Evropë.

Kapiteni i ekipit, austriaku Marcel Sabitzer ka shënuar dy golat e para të ekipit, ndërsa goditjen finale mamuzave të Jose Mourinhos i ka dhënë suedezi Emil Forsberg, që kishte zëvendësuar në të njejtën minutë kapitenin e ekipit dhe shënoi menjëherë për përfundimtaren 3-0 [Sabitzer 10, 21, Forsberg 87].

Leipzig nuk pranoi gol në asnjërën ndeshje nga Tottenhami, i goditur nga lëndimet dhe me rezultat të përgjithshëm 4-0 ecën drejt e në çerekfinale të Ligës së Kampionëve.

Përndryshe, Leipzigu është klub i formuar dhjetë vite më parë.