Mbappe show, Franca rrënon Argjentinën

Me një paraqitje maestrale të tinejxherit, Kylian Mbappe, Franca ka eliminuar finalistin e Botërorit të fundit, Argjentinën, duke e mposhtur 4-3.

Ndeshja ka qenë e jashtëzakonshme, derisa Franca kaloi heret në epërsi, kur Mbappe në një kundërsulm të shpejt u rrënua në zonë, që çoi në penallti.

Antoine Griezmann shënoi nga penalltia për 1-0.

Argjentina nisi organizimet për të barazuar dhe e arriti pas një goditjeje fantastike të Angel Di Marias, 4 minuta para fundit të pjesës së parë, 1-1. Hugo Lloris ishte i pafuqishëm në këtë rast, nga goditja e Di Marias.

RRUGA DREJT FINALES

Me të filluar pjesa e dytë Argjentina avancoi. Topin e dëbuar pas kornerit argjentinas e kapi Lionel Messi që shutoi drejt portës, ndërsa Gerardo Mercado e devijoi për 2-1 në të mirë të Argjentinës.

Pas kësaj, në fushë foli fuqia franceze. Ka qenë mbrojtësi i krahut Benjamin Pavard që me goditje nga jashtë ka gjetur portën për të barazuar 2-2.

E dalldisjen e mbrojtjes argjentinase e ka shfrytëzuar terminatori Mbappe, që me dy gola, fuqishëm, ka çuar Francën në epërsi 4-2.

Në minutat shtesë ka qenë Sergio Aguero që uli epërsinë franceze në një gol, duke shënuar për 4-3. Derisa Argjentina merr biletën kthyese për në shtëpi, Franca pret fituesin e ndeshjes Urugaj-Portugalia në çerekfinale.