Fitorja e parë ndaj Feronikelit, për të mbajtur hapin me kreun

Prishtina përgjatë këtij stinori ka pasur bilans negativ ndaj Feronikelit në Superligë. Dy takime, dy humbje për bardhekaltërit.

Mirëpo, në momentin kur atyre iu desht më së shumti fitorja, ata e arritën për të mbajtur hapin ndaj Dritës lidere, duke i mposhtur drenicakët 3-1 [Oto John 11, Gauthier Mankenda 45, Ahmed Januzi 57 - Albert Dabiqaj 12].

Një pasim i mirë i Armend Thaqit në kundërsulm, ka gjetur në vrap Oto Johnin që ka shënuar golin hapës të ndeshjes, duke ia dhënë epërsinë Prishtinës 1-0 (11’).

Por që në sulmin tjetër, mysafirët barazuan për të sjellë gjithçka në vend - golin e neutralizimit e shënoi Albert Dabiqaj kur Jean Carioca da Silva i asistoi atij nga goditja e këndit që në minutën e radhës dhe ky shënoi me kokë (12’) 1-1.

Pas kësaj vazhdoi loja e hapur, derisa tentimet e Besmik Bojkut (24’) dhe Mendurim Hotit (42’) ishin afër, e në anën tjetër vendasit e drejtuar nga Armend Dallku provuan me Ahmed Januzin (25’) dhe Oto Johnin (35’).

TABELA AKTUALE

E në minutën e fundit të pjesës së parë, pas një kombinimi të Johnit me Endrit Krasniqin, ky i fundit me lëvizje brilante iu shmang mbrojtësit, krijoi hapësirë dhe shutoi për të shënuar. Deniz Troshupa mbrojti goditjen e tij, e topin e dëbuar e futi në rrjetë Gauthier Mankenda (45’) 2-1, për t’i dhënë fund pjesës së parë me këtë rezultat.

Në pjesë të dytë rastet vazhduan dhe përsëri Prishtina shfrytëzoi sistemin e njëjtë sikurse në golin e parë. Asisti erdhi nga e djatha, derisa sulmuesi qëndronte në anën e majtë.

Me të pranuar topin Ahmed Januzi bëri lëvizjen mashtruese, iu shmang mbrojtësit mysafir dhe me të majtën në këndin e portierit goditi për të përcaktuar rezultatin përfundimtar të ndeshjes 3-1 (57’).

Raste kishin të dyja palët deri në fund, por Visar Bekaj në portë të Prishtinës si dhe Troshupa te ajo e Feronikelit të Afrim Tovërlanit - ishin në nivel të detyrës për të mos lënë më gola në ndeshje.

Me këtë fitore Prishtina ruan pozitën e dytë dhe distancën 4 pikëshe me liderin Drita. Në anën tjetër, Feronikeli mbetet pas katërshes kryesore tash për tetë pikë dhe thuajse pa gjasa reale për dalje në Evropë në stinorin 2020/21.