Derbi nga Premier Liga në Serie A

1. West Ham – Tottenham (e premte, ora 9)

Nga ky sezon, liga më e mirë në botën e futbollit ka nisur adetin e ndeshjeve të së premtes. Derisa nuk janë nga më interesantet e javës, edhe pse të pakta në numër, ndeshjet e Premier League të premten kanë qenë më interesante se sa përzgjedhjet inferiore në La Liga, Bundesliga, e Ligue 1. Edhe pse tradita do të vazhdoj edhe me italianët nga sezoni 2018-19, ndeshjet e të premtes do të vazhdojnë të mbeten inferiore ndaj ofertës së vikendit. Por, jo sonte.

Sonte është një derbi i Londrës i cili me një mençuri më të madhe të Slaven Bilic dhe menaxhmentit të West Ham gjatë verës, do të mund të ishte përballje për Evropë. West Ham është larg kësaj arritjeje, por disi ia kanë dal të këndellen me një ekip të përzier dhe të kapluar nga lëndimet. E në anën tjetër mund të shihni ekipin që po luan futbollin më të bukur në Premier League këtë sezon. Një ekip plot talente që me pak vendime të mençura në verë mund të shndërrohet në atë që tashmë është, krenaria e Londrës Veriore.

2. Manchester City – Crystal Palace (e shtunë, ora 1e30)

Merreni Cityn e Pellegrinit, dhe i shtoni edhe 170 milionë të shpenzuara gjatë verës dhe një trajner fitues. Ajo çfarë do të duhej të rezultonte është nja dy tituj kombëtar, dhe së paku një finale evropiane. Por, ajo çfarë kemi është një ekip që përkundër atyre dy shtesave vazhdon të luftoj për një vend të fundit që dërgon në Ligën e Kampionëve, derisa është eliminuar nga një ekip që është zënë në shah-mat nga Allegri.

Në anën tjetër Crystal Palace nën Sam Allardyce dhe me shfrytëzimin e ‘bërllokut’ të Liverpoolit ka arritur të ringjallet duke u larguar nga lufta për mbijetesë. Futbolli i Allardyce gjithnjë ka qenë shumë anglez, pa komplekse.

3. Juventus – Torino (e shtunë, ora 15n9)

Juventusi ka bërë lojën më të mençur ndër vite. Goditja në kundërsulme dhe me krahë të gjerë mbrojtjeje duke çarë mesin e vijës defensive, italianët kanë siguruar një epërsi pothuajse të pakapshme. Mbrojtja vazhdon të jetë fantastike tek italianët dhe derbin e Torinos mund ta luajnë edhe me lojtarët rezervë. Dhe këtu qëndron tmerri i vërtetë. Edhe vija defensive rezervë e Juventusit është më e mira në Itali, dhe vazhdojnë të shtojnë talente aty. Kinezët kanë ardhur vonë, shumë vonë për të shpëtuar futbollin italian.

Torino në anën tjetër ka ekip të talentuar, të përzier me tepricë të ekipeve me renome. Mbi të gjitha kanë një trajner karizmatik, aspak filozof, futbolli i të cilit nuk të kotë asnjëherë.

4. Arsenal – Manchester United (e diel, ora 5)

Kur jemi tek futbolli i mençur – Jose Mourinho. Është zor të kuptosh opinionin të cilët lojën defensive të Juventusit e konsiderojnë art, derisa atë të Mourinhos anti-futboll. Por, kjo është temë tjetër! Mourinho po bën punën më të mirë të mundshme tek United. Të gjithë lëshohen tek Fellaini dhe Lingaard. Të dy këta janë veglat kryesore që i ofrojnë siguri Mourinhos, së paku në idetë e tija. Fellaini mund të konvertohet nga mesfushor qendror, në gjysmë-sulmues që do të merrte me vete së paku dy mbrojtës në goditjet e lira. E njëjta vlen edhe Lingaard i cili shërben si fil labil për të çarë mbrojtjen me lëvizjet e tija. Lëndimet kanë lënduar, dhe mund të lëndojnë edhe të dielën Unitedin ndaj Arsenalit.

Fitorja e ‘gunners’ do të ishte e mirëseardhur vetëm për Wengerin. Arsenali ka humbur gjithçka të rëndësishme për të luftuar këtë sezon, dhe një vit në Europa League (po të jenë të mençur do të eliminoheshin qysh në rrethin e parë) do ti bënte mirë për rindërtim. Por, me Wengerin?!

5. Milan – Roma (e diel, ora 15n9)

Arsyetimet e fansave të ekipeve të Milanos për humbjet e tyre të fundit është që kinse të gjithë dëshirojnë të shmangin pozitën e gjashtë që detyron të nisin përgatitjet në fund të qershorit së paku për të qenë në dispozicion për rrethet fillestare të kualifikimeve për Europa League. Kjo do të jepte një sezon të gjatë e të lodhshëm për ta, diçka që s’do të preferonin tashti që pozita e katërt e Italisë dërgon direkt në Ligën e Kampionëve.
Por, në fakt, që të dy ekipet e Milanos janë të udhëhequra nga trajnerë mediokër, të cilët humbin pikë duke iu mbështetur filozofisë italiane të futbollit defensiv, filozofi të cilën nuk guxojnë ta lënë anash as kur ndeshen me ekipe që ‘luftojnë’ për mbijetesë.

Lajmi më i mirë për Romën është pensionimi i Tottit. Lajmi tjetër më i mirë do të ishte largimi i De Rossit dhe shkarkimi i Spallettit. Monchi duhet të çmontoj skeletin e kalbur të kësaj Rome. Ardhja e Emeryt dhe Baccas shihet si diçka pothuajse e sigurt për të ndodhur. Por, së pari është e nevojshme sigurimi i pozitës së dytë.